مدينة النعمان ((الاعظمية))

موضوع: مدينة النعمان ((الاعظمية)) 25.01.08 11:44

[center]مــــــدينــــــة الــنــعــمـــــــــان
مدينة النعمان يا أحلى مدينه
يا رمز الإخوّة ومجد هالتاريخ
يا رفعة راسنه وحنـّة إدينه
يا ضوة الـﮝـمر الينور ظلام الليل
يا شمس الفجر اللي تصحينه
يا معنى الشجاعة ونخوة عثمان
عثمان الرفض تغرك اهالينه
يلبيج على الجرف مرقد النعمان
وجرفـﭻ الثاني للكاظم يودينه
يا محلى الشموع الي تملي دجلة الخير
شموع التنعلـﮒ بمولد نبينه
على دجلة الطيور ونوارس بيض
دليل طيبة ﮔـلب اهل السفينه
من عينـﭻ بقينه نشرب دموع
وبحضنـﭻ الدافي يمه احنه غفينه
بدﮔات الـﮔلب ﭼنتي الي تلولين
وبعينـﭻ فرشنه وبجفنـﭻ تغطينه
ما عاش اليذلـﭻ وانتي رفعة راس
ولا عاش اليضحك وانتي حزينه
ولا عاش اليريدﭺ دوم تنزفين
ولا عاش اليريدﭺ بالسور سجينه
انكسر ﮔـلبي عليـﭻ من شفتـﭻ تبـﭼين
تصيحين بقهر ولكم وين اهالينه
شو بمولد نبينه ما علـﮕتو شموع
علـّﮕتو النعي وما علـّﮕتو زينه
ناس اتهجرت وناس خذاها الموت
من حكم الذي اليوم ناسي دينه
مو بس بالبشر هم فجرو الجسور
والصرافية يشهد على الجره بينه
لا فيلق غدر ولا جيش الانذال
ولا القاعدة بيوم راح تـﮕدر تمشينه
حكومة وجيش وشرطة وامريكان
مهما حاربوﭺ تبقين انتي الامينه
منريد القاعده ولا قتل لا تهجير
ومنريد صحوة لأن ما يوم غفينه
نريد البسمة احنه لكل طفل محروم
ونريد الضحكه الحلوة تملي عينه
نريد نعيش احنه اخوان واخوان
مثل ما عشنا العمر بكل سنينه
ونريد الخير كله يعم على البلاد
من زاخو للفاو .. ولهاي المدينه
نحبـﭻ وما نـﮝدر نعيش بلياﭺ
ومكانـﭻ بالـﮝلب انتي تعرفينه
اعظمية بالـﮝلب انتي تضلين
وحبـﭻ صار دمنه هم يجري بينه
............ ......... ......... ......... ........
............ ......... ......... ......
............ ......... .
الشاعر عبدالقادر العاني

[/center]

موضوع: رد: مدينة النعمان ((الاعظمية)) 30.01.08 17:24

عاشت الاعظمية باهلها وناسها وبناياتها وحفظها الله تعالى من كل مكروه وسوء وجعلها منارا يهتدى بها وجزاك الله خيرا اخي الاعظمي على هذه القصيدة