نته وين الوطن وينه

عنوانك وين ياوطني ؟ عنوانك وين ؟
وين أنت ياوطني نازل ؟
وين أنت ياوطني ساكن؟
ضعنا وضيّعنا عنوانك ..
وماعادت قيمة لأنسانك ..
عنوانك وين ياوطني ؟ عنوانك وين ؟

في أي مدينة منكوبة ؟
ياوطن الجثث المرمية !
في أي مدينة مسلوبة ؟
وانجومك فيها مطفية !
في أي مدينة منهوبة ؟
دليني ّ ياوطني الضايع
في ليل الأمة العربية ؟
عنوانك وين؟ وين أنتّ ؟
يادار الخير المسبية؟
ضعنا وضيّعنا عنوانك ..
وماعادت قيمة لأنسانك ..
وين أنت ياوطني نازل ؟
وين أنت ياوطني ساكن؟
عنوانك وين ياوطني ؟ عنوانك وين ؟

في أي مجازر عنوانك
وأيامك كلها مجازر ؟
في أي مقابر عنوانك
وأدروبك كلها مقابر ؟
والشعب الشايل تابوتك
يفترّ أبتابوتك حاير !
ماظلت بعيونه أدموع !
وماعاد الصبر أيكفيّه !
ولاهو على فقدك كًادر !

وين انت ياوطني ساير ؟
وين أنت ياوطني صاير ؟
والناس اللّّيّ كنت اتلمهم
أحبابك في الوطن العامر ..
صاروا كل واحد على غيمة
و كلمن على ربعه دايرّ !
ماأدري وين يسكنون ؟
وأنت بأي مقبرة ساكن ؟
ضعنا وضيّعنا عنوانك ..
وماعادت قيمة لأنسانك ..
عنوانك وين ياوطني ؟ عنوانك وين ؟

أمريكا أتذبحك يوميّاً ..
والعرب أتذبحك قوميّاً ..
وألشيعة أتذبحك سنيّاً..
والسنة أتذبحك شيعّياً ..
والكرد أتذبحك عربياَّ..
والترك أتذبحك كردّياَ ..
والسلفي يذبحك مسيحيّاً
وايران أتذبحك عراقّيّاَ ..
وكل يوم أيفجرك أبن لادن ..
وأشلاءك في كل الدنيا ..
وقبورك ماتلقى أماكن ..
وأولادك سكان الغربة ..
وثرواتك بيدين السارق ..
وبترولك بيدين الدائن ..
ياويلي وويلك ياوطني ..
من زمن المحتل والخائن ..!
ضعنا وضيعّنا عنوانك ..
وماعادت قيمة لأنسانك ..
عنوانك وين ياوطني ؟عنوانك وين ؟

ياوطني المرسوم ابعيني
نهرين وقمر وبستان ..
ياوطني المحفوظ ابقلبي
قصيدة لأحلى الأوطان ..
ياوطني المكتوب بروحي
أغاني بأحلى الألحان ..
ياوطني ياصورة عمري
مرسومة بكل الألوان ..
مرسوم بأوصاف الجنّة
الموعودة بكل الأديان ..
يا أول من كتب بأيده
للدنيا حقوق الأنسان ..
يا اول منزل بالكون
ويا أول ديرة وعنوان ..
ياحيف أتضيع وتتقسم
غنائم بيد الشيطان ..!
مبيوع وبالسوق السودة
مابين أمريكا وأيران ..!
ياحيف اتضيع ياوطني
وشعبك في كل البلدان ..!
لاجيء مايلقى منازل !
حاير مايلقى مساكن !
ضايع مايلقى العنوان !
عنوانك وين ياوطني ؟.. عنوانك وين ؟ **